Kembang Wijaya Kusuma

Kembang Wijaya Kusuma

Cinarita duk ing nguni ana sawijining kadipaten kang aran Kadipaten Banakeling. Kang jumeneng Adipati ajejuluk Raden Adipati Bandhapati. Sekti tanpa tandhing marga kagungan senjata piyandel kang sinebut “GilingWesi”. Tan kacrita sapa garwane, ananging kagungan putra putri kang sulistya wernane yaiku Raden Ayu Bandhawati.

Nganak diwasa Raden Ayu Bandhawati tansaya moncorong rupane nganti akeh para adipati sak ubenge Kadipaten Banakeling padha kayungyun arep nggarwa sang dewi. Saking akehe adipati  kang ngayunake Raden Ayu Bandhawati, Raden Adipati Bandhapati, wara-wara ngetokake sayembara.

            “Sapa wae kang bisa ngasorake aku, kuwat nadhahi senjata Giling Wesi dakparingi   ganjaran dhaup karo Raden Ayu Bandhawati !”mangkono unine sayembara.

            Gumrudug para adipati padha ngadu kasekten, nanging mung siji kang kuwat nadhahi senjata Giling wesi, yaiku priya kang isih keturunane Kyai Ageng Giri kang peparab Raden Pucang kembar. Mula Raden Pucang kembar banjur kadha upake karo Raden Ayu Bandhawati.

            Sajrone jejodhowan sih-sinisihan Raden Pucangkembar lan Raden Bandhawati pinaringan putra telu cacahe, salah sijine Raden Danumaya. Erame . . ., nganti Raden Danumaya ngancik diwasa, endah rupane Raden Ayu Bandhawati ora suda, kepara malah saya mencorong. Mula para adipati kang nate kalah sayembara isih arep ngrebut Raden Ayu Bandhawati. Ora mung kanthi alus nanging kanthi kasar nglurug peperangan. Parandene kabeh adipati padha asor yudane najan mung diadhepi dening Raden Danumaya.

            Ing sawijining peperangan, nalika Raden Danumaya ayun-ayunan klawan Raden Adipati Djaka Puring, Raden Ayu Bandhawati lenggah ana ing panggung mriksani yudane ingkang putra. Peperangan saya rame. Nanging Raden Adipati Djaka Puring nemu akal. Olehe tarung perang saya nyedhaki palenggahane Raden Ayu Bandhawati. Breng wis cedhak, Raden Adipati Djaka Puring ninggal palagan, niyate arep nubruk Raden Ayu Bandhawati ndang tumuli digawa mlayu.

            Raden Ayu Bandhawati waspada. Nalika arep ditubruk, kanthi cukat trengginas mletik ngendhani. Amarga saking kuwate anggone mlesat ngoncati bebaya, adoh banget nganti tuniba ana ing sawijining pulo karang yaiku Majethi. Saka kersaning jawata, abreng tuniba Raden Ayu Bandhawati musna lan jilma dadi tetuwuhan arupa siji-sijine kembang kang banjur diarani kembang “ Wijayakusuma”.

            Pisan iki Raden Danumaya kalindhih yudane, banjur ngoncadi paperangan. Dheweke semedi ing Gunung Lawu mintaraga kekuwatan. Sajroning semedi, sawijining dina Raden Danumaya kaparingan wangsit. Keprungu swara tanpa rupa, swara mau kepara memper karo swarane ingkang ibu kang wis suwe muksa.

            “Yen kowe kepengin unggul ing yuda la gedhe ing kawibawa, kowe njujuga mengulon pethiken kembang Wijayakusuma kang cumondhok ana pulo Majethi, ing sisih wetane pulo Nusakambangan !” mangkono wangsit kang tinampa Raden Danumaya.